Xuska Maalinka Ciidanka Hawaarto



 

      

Tababar Loo Hayay Macalimiinta Dhiga Sayniska Iyo Xisaabta Oo Lasoo Gabagabeeyay

Jigjiga( Cakaaranews) Jumce 6da January 2017. Tababar uu soo agaasimay xafiiska waxbarashada DDSI waaxdiisa horumarinta macalimiinta iyo waxbarashada DDSI oo loo qabtay macalimiinta dhiga maadooyinka Sayniska iyo Xisaabta ee dugsiyada hoose dhexe ee gobolada Faafan, Jarar,Siti iyo Erar, ayaa lagusoo gabagabeeyay  kuliyada maaraynta iyo adeega shacabka DDSI.

Hadaba tababarkan ayaa waxaa xidhitaankiisii ka hadlay Wasiirka xafiiska waxbarashada DDSI mudane Ibraahim Mahad oo sheegay inuu tababarkan ujeedadiisu ahaa mid kor loogu qaadayo  garaadka aqooneed ee barayaasha dhiga maadooyinka Sayniska iyo xisaabta ee dugsiyada hoose dhexe oo ka kala yimid degmooyinka gobolada faafan, jarar, Siti iyo Erar. Sidoo kale wuxuuna wasiirku kula dardaarmay barayaasha inay aqoonta ay ka faaiideen tababarka ay ka dhaqangaliyaan schoolada ay barayaasha ka yihiin, Isagoo wasiirku xusay  inuu xafiiska waxbarashada heer deegaan uu  dadaal dheer ugu jirto siduu kor oogu qaadi lahaa tayada macalimiinta deegaanka islamarkaana uu macalimiinta deegaanka uqabto tababaro lagu kobcinayo garaadkooda aqooneed ee barayaasha.

Dhanka kale waxaa isana xidhitaankii tababarka ka hadlay agaasinka horumarinta macalimiinta iyo waxbarashada DDSI mudane Farxaan Cabdi Makhtal oo sheegay in tababarkan oo socday mudo 5 cisho ah lasoo gabgabeeyay islamarkaana barayaasha looga baahan yahay ficilkii iyo inay usii gudbiyaan goobaha ay ka howlgalaan islamarkaana ku dadaalaan sidii ay usoo saari lahaayeen arday tayo leh. Ugu danbayna waxaa dareenkooda ka hadlay qaar kamid ah barayaasha tababarka qaadanayay oo sheegay inay wax badan ka faaiideen tababarka islamarkaana ay ka dhaqan galin doonaan schoolada ay ka howlgalaan.