Darawalada iyo Mulkiilayaasha Gaadiidka Yaryar Ee MM Dh/buur iyo MM Q/Dahar Oo Soo Dhaweeyay Bixinta Taarikada Cusub Ee lasoo Gaadhsiiyay

Qabridahar(cakaaranews)Arbaco, 13ka September 2017. Darawalada iyo mulkiilayaasha gaadiidka yaryar ee kakalashaqeeya xaafadaha magaalooyinka dhagaxbuur iyo qabridahar ayaa soo dhaweeyay bixinta taarikada cusub ee uu soogaadhsiiyay Xafiiska Gaadiidka, Ganacsiga iyo Warshadaha DDSI.

Hadaba, Kusimaha Xafiiska Gaadiidka iyo Ganacsiga ahna Madaxa Xafiiska Maayorka MM Dhagaxbuur mudane Xuseen Cabdi Nuur oo kahadlay taarikadan la soogaadhsiiyay gaadiidka yaryar ee magalada ayaa sheegay in bajaajta magaalada dhagaxbuur ay adeeg aad ufiican uhayso bulshada islamarkaana ay ka kalashaqayso xaafadaha magaalada dhagaxbuur. Wuxuuna intaa kudaray in ay horumar wayn tahay in xafiiska ganacsiga, gaadiidka iyo warshadaha DDSI ay soogaadhsiyaan taarikada cusub ee gaadiidka yarar kaasoo ah adeeg muhiim ah oo ay u baahnaayeen mulkiilayaasha iyo darawalada gaadiidka yaryar.

Sidookale, mudane Cabdifataax Xirsi Carte oo ah khabiir katirsan xafiiska gaadiidka ganacsiga iyo warshadaha DDSI islamarkaana kamid ah kooxdan adeegan taarikada gaadhsiiyay maamul magaalyinka qabridahar iyo dhagaxbuur ayaa sheegay in xafiisku uu hada kahor qorshe u qaatay in dhamaan gobolada, maamul-magaalyinka iyo degmooyinka deegaankaba uu gaadhsiiyo adeegyada ay ubaahan yihiin gaadiidlaydu. Wuxuuna intaa kudaray in shaqaalaha xafiisku uu wareego islamarkaana uugaadhsiiyo adeegyada gaadiidka ee sida boolooyinka, taarikada iyo adeegyada kale ee muhiimk ah.

Dhanka kale, mudane Cabdinaasir Muxumed oo ah khabiir katirsan xafiiska gaadiidka, ganacsiga iyo warshadaha MM Qabridahar oo isna dhankisa kahadlay ayaa sheegay in maanta ay qaybiyeen ama ay sameeyeen taarikaynta gaadiidka yarayar ee  Magaalada qabridahar kaasoo ah adeeg aad ay ugu baahnaayeen gaadiidlayda yaryar ee mm q/dahar. wuxuuna mahadcelin u soojeediyay kooxdan soogaadhsiisay adeegan taarikada e kasocotay xafiiska gaadiidka, ganacsiga iyo warshadaha DDSI.

Ugudanbayna, mulkiilayaasha iyo wadayaasha gaadiidka yaryar ee looyaqaano bajaajta iyo Forsida ayaa bogaadiyay adeegan taarikada ee uu soogaadhsiiyay xafiiska gaadiidka, ganacsiga iyo warshadaha DDSI. Waxayna xuseen in ay u mahadcelinayaan shaqaalaha xafiiska iyo masuuliyiintiisaba.