Tababar Ku Saabsan U Adkaysiga Dhibaatooyinka Dabiiciga ah Oo Ka Furmay Jigjiga.

Jigjiga,(cakaaranews),Arbaca, 20ka September, 2017. Tababar uu soo diyaariyay xafiiska xoolaha iyo horumarinta reer guuraaga DDSI  oo kaashanaya hay'ada  FAO ayaa ka furmay magaalada jigjiga.

Tababarkan oo ay ka soo qaybgaleen xubno ka socday xafiisyada iyo haay’adaha ay bahwadaagta yihiin xafiiska xoolaha iyo horumarinta reer-guuraaga DDSI ayaa waxay ujeedadiisu tahay sidii ay xafiisyada dawlada  iyo hay’adaha aan dawliga ahayn u xoojin lahaayeen hirgalinta qorshayaasha u adkaysiga dhibaatooyinka dabiiciga ah  gaar ahaan sida looga gaashaanto xaaladaha abaaraha soo noq-noqda iyo adkaynta xidhiidhka iskaashi ee xafiisyada dawlada iyo haay'adaha aan dawliga ahayn.

Waxaana furitaankii tababarkan ka hadlay wasiir ku xigeenka xafiiska xoolaha iyo horumarinta reer-guuraaga DDSI mudane Cali Cumar oo ka warbixiyay ahmiyada iyo ujeedooyinka tababarkan isaga oo sheegay in uu yahay mid ku salaysan sidii fahan buuxa oo midaysan looga qaadan lahaa isku xidhka arimaha bini-aadantinimada iyo horumarka bulshada deegaanka ,  sidii  gaashaan adag looga samaysan lahaa khataraha masiibooyinka dabiiciga ah taasi oo suurta galinaysa in ay bulshada xoolo dhaqatada ah iyo kuwa xoolo dhaqato beeralayda ah ugu adkaysanlahaayeen dhibaatooyinka dabiiciga ah ee  ka yimaada cimilada isbedasha oo keena  xaaladaha abaarta wasiir ku xigeenka ayaa ku booriyay xubanahan tababarka  loo furay in ay sidii loogu talagalay uga faa’iidaystaan mudada uu socda si looga midho dhaliyo ujeedooyinka tababarkan.

 

Qaarka mid ah masuuliyiintii ka socday ha’yadaha oo ka hadlay furitaankii tababarkan ayaa sheegay in ay tahay mid loo baahan yahay sii xoojinta xidhiidhka iskaashi ee ka dhexeeya haa’yadaha dawlada iyo kuwa aan dawliga ahayn si looga midho dhaliyo qorshayaasha horumarineed ee u dajisan dalka iyo deegaanka iyo si looga gaashaanto dhibaatooyinka ay keento cimilada isbadashay oo ay ka mid tahay xaaladaha abaarta oo saamayn xoog leh u gaysta bulshada xoolo dhaqatada iyo xoolo dhaqato beeralayda. Tababarkan ayaa socondoona mudo 3 maalmood ah.