Wasiirka Dhalinyarada Iyo Ciyaaraha DDSI Oo Ka Warbixiyay Xidhmooyinka Horumarinta Dhalinyarada DDSI.

Jigjiga(Cakaaranews) Isniin 13ka November 2017. lataliyaha madaxwaynaha ee dhanka saxaafada ahna Wasiirka dhalinyarada iyo ciyaaraha DDSI mudane Maxamed Bile Xasan (Miig)  ayaa ka warbixiyay jihooyinka iyo istaraatajiyadaha lagu horumarinayo dhalinyarada DDSI laguna xaqiijinayo isbedalka horumarinta dhalinyarada xili uu la dardaarmayay gudiga isku dhafka ah ee  hogaaminta arrimaha dhalinyarada DDSI .

wasiirka ayaa sheegay in sanadihii ugu dambeeyay xukuumada DDSI xooga saartay sidii looga midho dhalin lahaa xidhmaha horumarinta dhalinyarada wasiirka ayaa intaa kudaray  in ay dhalinyarada deegaan ku yihiin laf-dhabarta bulshada deegaanka islamarkaana door muhiim ah ku leeyihiin taaba galinta xaqiinta hirgalinta qorshayaasha horumarineed ee lagu tir tirayo saboolnimada iyo shaqo la aanta islamarkaana lagu gaadhayo wadamada dhaqaalahoodu meel dhexaadka yahay.

Dhinaca kale waxa uu sheegay wasirku in sanadka xooga la saarayo hirgalinta qorshaha cusub ee xidhmaha horumarinta dhalinyarada oo ah qorshe dalka iyo deegaanku qaateen si loo dar dargaliyo hirgalinta xidhmaha horumarinta dhalinyarada wasiirka ayaa sheegay in si taasi loo suurta galiyo la aas aasay gudiga iskudhafka ah ee  hogaaminta hirgalinta arimaha dhalinyarada gaar ahaan xidhmaha horumarinta dhalinyarada gudigaasi oo isugu jira heer deegaan, heer gobol, degmo ilaa heer tuulo kuwaasi oo ay ujeedada loo aas aasay tahay hirgalinta xidhmaha horumarinta dhalinyarada oo ah nidaam cusub.

Ugu dambayntii waxa uu wasiirku ku booriyay gudiga hogaaminta arimaha dhalinyarada ee gobolada, degmooyinka iyo tuulooyinka DDSI in ay xooga saaraan taaba galinta iyo meel marinta qorshahan cusub ee xidhmaha horumarinta dhalinyarada si looga midho dhaliyo yoolasha lagu tir tirayo saboolnimada.