Tababar Kor Loogu Qaadayo Barayaasha Luuqada Afka Soomaaliga Ee Gobolka Afdheer Ayaa Ka Qabsoomay Degmada Jarati

Jarati(Cakaaranews) Sabti 9ka December 2017. Tababar uu soo diyaaryay xafiiska waxbarashada DDSI oo loo qabtay macalimiinta luuqada afka soomaaliga ee degmooyinka gobolka afdheer ujeedadiisuna ahaa sidii kor loogu qaadi lahaa garaadka aqooneed ee barayaasha afka soomaaliga degmooyinka gobolka liibaan ayaa ka qabsoomay degmada Jarati ee  gobolka afdheer.

Hadaba tababarkan oo uu furintaankiisii ka hadlay gudoomiyaha kuxigeenka gobolka afdheer mudane Cabdi Ibraahim Maxamed   oo sheegay in tababarkan yahay mid muhiim ah islamarkaana loo baahanyahay inaad ka faaiidaysataan mudada cashirku socdo wakhtigana ilaalisaan.

Dhankiisa waxaa isana faahfaahin dheer ka bixiyay tababarkan madax kooxeedka tababarada macalimiinta ee waaxda  Horumarinta Macalimiinta iyo Hogaaminta waxbarashada mudane Cabdiwali Axmed Yaasiin   ayaa  sheegay in tababarkan ay fulintiisa iska kaashadeen xafiiska waxbarashada DDSI, Hay’ada USAID, hay'ada RTI iyo waliba mashruuca READ TA islamarkaana lasiinayo barayaasha luuqada afka soomaaliga ee fasalada 5aad ilaa 8aad. Kuwaasoo laga soo kala xulay dhamaan degmooyinka Gobolka afdheer. Wuxuuna  intaa kudaray in  tababarkani uu soconayo mudo 10 cisho ah. Iyadoo casharada lasiinayo barayaasha ay ku qotomaan luuqada Afka-soomaaliga akhriska iyo qoraalkeedaba iyo waliba nidaamka ama shuruucda baris barasho ee looga baahan yahay macalinka luuqada Afka-Hooyo .

Ugu danbayna waxaa dhankooda ka hadlay qaarkamid ah barayaashii qaadanayay tababarka oo sheegay inay si fiican qaadan  doonaan mudada uu cashirku socdo islamarkaana uga faaiidayn doonaan ardayda wax kabarata  dugsiyadii ay ka kala yimaadeen.