Shirwaynihii 12aad Ee wadatashiga Xukuumada Iyo Shacabwaynaha DDSI Oo Lasoo Gaba-gabeeyay

Awbare(Cakaaranews) Isniin, 14ka, May 2018. Shirwaynihii 12aad ee wadatashiga xukuumada DDSI  iyo shacabwaynaha oo ay kasoo qaybgaleen in kabadan 3000 oo ergooyin kakala socday 11ka gobol, 6da maamul magaalo iyo 93da degmo islamarkaana lagaga wada hadlayay horumarka nabadgalyada nidaamka maamulka suuban iyo dibucurashada oo maalmihii ugu danbeeyayba ka  socdey degmada awbare ee gobolka faafan ayaa si heer sare ah lasoo gabagabeeyay.

Haddaba shirwaynaha 12aad ee wadatashiga xukuumada DDSI iyo shacabwaynaha oo ay kasoo qaybgaleen mas’uuliyiinta ugu saraysa xukuumada DDSI oo ugu horeeyo madaxwaynaha DDSI mudane Cabdi Maxamuud Cumar, afhayeenka golaha xildhibaanada mudane Maxamedrashid Isaaq, Madaxwayne Kuxigeenka ahna wasiirka xafiiska horumarinta beeraha iyo khayraadka dabiiciga marwo sucaad Axmed Faarax, Madaxwayne Kuxigeenka Ahna wasiirka xafiiska caafimaadka DDSI mudane Xamdi Aadan, wasiirada, wasiir kuxigeenada, 3000 oo ergooyin kasocdey gobolada, MM iyo degmooyinka deegaanka, odayaal dhaqameedka deegaanka, culimo owdiinka, qurbojoogta deegaanka ee ka kala yimid daafaha caalamka, kooxa fanka ee deegaanka iyo marti sharaf kale oo ka socdey somaliland.

Waxayna ergooyinka soo jeedinayeen fikiro saliim ah oo kusalaysan sidii loosii xoojinlahaa korna loogu qaadilahaa horumarka, nabadgalayada maamulka suuban iyo nidaamka dibucurashada oo gun dhig u ah isbadalka horumarineed ee ay shacabka DDSI ku naaloonayaan maanta. Waxayna ergooyinku carabka ku adkeeyeen inay ruux walba cadaw ku ah horumarka deegaanka ay gacan bir ah ku qabanayaan ugana horeynayaan xukuumada. Sidoo kale ergooyinka ka socday 11ka gobol, 6da MM iyo 93da degmo ee uu ka koobanyahay deegaanku ay umahad celiyeen sida quruxda badan ee ay shacabka awbare usoo dhaweeyeen una qaabileen ergooyinkan tirade badan ee ka socdey guud ahaanba deegaanka mudadii uu shirwaynuhu socdey.

Dhanka kale odayaasha, dhalinyarta, Waxgaradka culimo owdiinka ka socdey gobolka faafan gaar ahaan demooyinka qabribayax, araarso iyo mula ayaa suldaanimo u caleema saaray inuu suldaan unoqdo beesha abaskuul Suldaan Cabdikariin Qalinle.

Ugu danbayna odayaal dhaqameedka degmada awbare ayaa waxay Book hadiyad qaali ah oo katurjumayay tacliinta iyo aqoonta ay caanka ku yihiin bulshada ku dhaqan degmada awbare iyo xarumaha hoosyimaada ee ay xarunta utahay degmada awbare  gudoonsiyeen Madaxwaynaha DDSI mudane Cabdi Maxamuud Cumar, Isagoo madaxwaynuhu ka gudoomay Hadiyada qaaliga ah ee ay gudoonsiiyeen odayaal dhaqameedka awbare islamarkaana ku amaanay shacabka awbare inay waligood caan ku ahaayeen aqoonyahanimo. Waxaa kale uu madaxwaynuhu uga mahadceliyay shacabka awbare sida sharafta leh ee ay uqaabileen islamarkaana ugu adeegeen ergooyinka shirwaynaha ee ka socdey guud ahaanba deegaanka mudadii ay martida u ahaayeen.