CakaaraNews

Jigjiga (CakaaraNews) Waftigii ka socday Qurba joogta Dalka Mareykanka gaar ahaan Gobolka Minnesota ee matalayay Jigjiga TV ayaa wali aynan fari ka qodnayn booqashadii ay ku marayeen Dawlada Degaanka Soomaalida.

Wafdigaas ayaa laga soo bilaabo imaatinkoodii ilaa wakhtigan aan salka dhigin, waxayna ay ku guda jiraan booqashooyin kala duduwan, oo ay ku booqanayeen mashaariicda horumarinta ee ka socda Dawlad Degaanka Soomaalida.

Waxay wafdigu booqdeen mashaariicda dhinaca horumarka ay ee ay dawladu ka wado degaanka. Waxaa kaloo ay kulamo la yeesheen bulshada qaybaheeda kala duduwan.

Booqashooyinka wafdigan ka socday Bahda Jigjiga TV ayaa cadaynaysa baahida badan ee ay umadooda iyo Dawlad Degaankooga ay u qabaan inay la xidhiidhaan qurbo joogta u dhalatay Degaanka Soomaalida ee ku kala sugan daafaha dunida.

Isla markaana waxa ay maanta booqasho ku tageen goobo kala gadisan oo ka tirsan Degmada Jigjiga gaar ahaan, dugsiyo waxbarasho oo ku kala yaala Tuulada Dundumo Cas iyo Tuulada Shabeeley.

Waftigaas waxaa hor kacayay masuuliyiin ka kala socday xafiisyada Dawlada oo ay ka go'an tahay in ay aqoontooda iyo xirfadoodiiba ugu adeegaan bulshadooda.

Masuuliyintan oo kala ahaa Gudoomiyaha Degmada Jigjiga Mudane Xirsi Maxamed Dool, Wasiir ku xigeenka Maaliyada Mudane Sheekh Xasan Maxamuud, Wasiir ku xigeenka Wasaarada Waxbarashada Mudane Cabdulaahi Maxamed Gisile.

Waxaa kaloo wafdiga booqashadooda ku weheliyay  Garaad Maxamed Dool iyo Masuuliyiin kale, waxayna halkaas kula kulmeen dhamaanba dadka degan Tuulooyinkaasi.

Gabagabadii booqashada waftigu waxay wada jir ahaan ku wacyi galiyeen dadkii ay la kula kulmeen, iyagoo ku booriyay sidii ay u ilaalin lahaayeen Nabadgalyadooda ugana shaqyn lahaayeen Horumarka deegaankooda.